Kám-kak ka-kī chiok khiáu ê gín-á(?)

Kin-á-ji̍t ha̍k-hāu kî-tiong-khó, tú-tio̍h gín-á chok-pè, thâu chi̍t piàn tn̄g tio̍h, A thoân siu-chèng-tòa hō͘ B khai-sí, góa tō it-ti̍t leh kā lió, khòaⁿ in leh pìⁿ-siáⁿ-báng.

Khòaⁿ B tī siu-chèng-tòa siá-jī. Siūⁿ kóng i nā koh hôe thoân hō͘ A, tō chai sí. B chai-iáⁿ góa it-ti̍t leh kā khòaⁿ, khó-kǹg siá liáu, koh kā iân-pit-a̍p-á tòng góa ê sī-sòaⁿ, i phak--lo̍h-lâi chhiú chhiu khì thâu-chêng ê C, C chhiú mā àm-àm-á chhun khì āu-piah. 

Hó--ah, kâu-gín-á, góa kiâⁿ--kòe kiò i kā mi̍h-kiāⁿ kau--chhut-lâi. I chhiú chhun hō͘ góa khòaⁿ bô mi̍h-kiāⁿ, kiám-chhái sī chhàng ji̍p-khì khò͘-tē-á--ah. 

Góa bô hoat-tō͘ chhiau-sin. Phīⁿ-á bong--leh, tńg káng-tâi thoân sìn-sit kā cho͘-tiúⁿ kóng chit-kiāⁿ tāi-chì, cho͘-tiúⁿ hoan-hù góa kā hōbé kì--khí-lâi. Kau khó-kǹg tńg-kh.

Ha̍k-hāu ê kàn-sū kóng góa bô the̍h tio̍h chèng-kù, chin pháiⁿ lia̍h, chèng-kì ē hō͘ gín-á tàn-hìⁿ-sak. Kàu-chi tông-sū chin ūkeng-giām kóng he chiok pháiⁿ lia̍h, jî-chhiáⁿ sī  kui kûn--ê.

Tio̍h--ā, góa bô siūⁿ tio̍h B ē thoân hō͘ thâu-chêng ê C...

Thâu-chi̍t piàn tú-tio̍h gín-á chok-pè, beh lia̍h koh lia̍h bô, góa si̍t-chāi hân-bān...(Chē-ūi e̍h koh kheh)

Gín-á chok-pè ê sim-lí mā kài chhù-bī, thài ē siūⁿ kóng lāu-su khòaⁿ bô, iōng chi̍t ê sè-sè-ê iân-pit-a̍p-á cha̍h--leh tō siūⁿ kóng lāu-su khòaⁿ bē tio̍h? Ah-sī góa khòaⁿ khí-lâi chiok hó khi-hū só͘-í chiok káⁿ? M̄-koh khòaⁿ he pān-sè sī koàn-hoān, eng-kai sī ū chok-pè sêng-kong kòe.M̄ chai that tio̍h góa chit ê khòaⁿ khí-lâi hó khi-hū ê thih-pang. In sī ōe tap-àn-khah, kin-pún tō iōng bē tio̍h siu-chèng-tòa. Kā lāu-su tòng-chò pe̍h-chhi tō = ="

Góa ê khò kàu tē 7chiat 3tiám pòaⁿ, kàm-khó liáu tō kóaⁿ khì chiap cha-bó͘-kiáⁿ pàng-o̍h, gín-á mā khó 2 kang khó-liáu thê-chá pàng-o̍h.

Àm-thâu-á cho͘-tiúⁿ khà--lâi kā góa khak-jīn sī siáⁿ-lâng thoân siáⁿ-lâng. In-ūi góa bô tong-tiûⁿ lia̍h tio̍h chèng-kù, kin-á-ji̍t e-po͘ in-pan tō-su kahgín-á bú chiok kú, C kóng siu-chèng-tòa sī i beh siá hō͘ B--ê. M̄-koh tap-àn-khah sêng-chek lù--chhut-lâi. B khó 98hun, C khó 70kúi, thài ū khó-lêng C chhau tap-àn hō͘ B khó koân-hun. 

Cho͘tiúⁿ bô khà lâi mn̄g góa í-keng bē-kì-tit ha̍k-hāu ê tāi-chì, góa thé-la̍t kah kì-ek si̍t-chāi, ài koh hùn-liān...