藏佇身軀邊 ê 愛

《藏佇水底的愛》頂學期我佇國二有教著仝名 ê 文選，彼時就予這篇感動著。

也袂記得頭一遍佇佗位看過崇憲老師，檢采嘛是佇線頂 ê 研習啦！後來面冊家己跳出推薦 ê 數號，我就大面神kā人加面友，到今猶未實際見過面。

收著老師 ê 冊，掀開冊皮，看著老師手寫 ê 字「台語復興鬥陣行」，雄雄我規个人閣大凍機。頂回佇線頂我講：我是一个無經驗無背景拄好考著資格，就入校做支援教師教台語文，教甲有。夠。痛。苦。

我這馬猶原嘛是按呢感覺，毋過啥人無壓力，就算按呢，我猶是想講行一步算一步。有老師親筆手寫 ê 鼓勵，若像熟似真久 ê 感覺，真奇妙...

《藏佇水底的愛》這本冊，讀起來 ê 感覺，嘛若像熟似真久矣，其實才頭一遍掀開來看，煞有微妙 ê 親切感，老師出版的《台語俗諺鬼神記事》、《納尼亞傳奇-獅仔、魔女佮Thàng-suh》風格完全無仝，這本用台文寫台灣故事、寫感情，閣較貼近咱台灣ê風土情意，寫身軀邊 ê 愛，上蓋有共鳴。

恭喜崇憲老師出新冊，逐本風格攏無仝逐本齊精彩，若攏猶未入手--ê，推薦先ùi這本開始讀。有詩、有散文、有小說，大人囡仔攏適合來讀看覓，來做伙讀咱台灣勻勻仔愛 ê 台文生活。