Cc chhiò-ōe: Ē keng-kòe
Chá-khí kah cc kiâⁿ lō͘ khì ha̍k-hāu ê lō͘--lih BC: m̄ sī ta̍kê lâng(chèng-siông-lâng) lóng ē ji̍p-khì cheng-sîn pēⁿ īⁿ. CC: ē keng-kòe. BC: ???? ( ！！！) XD XD XD
發表文章
khangkhang ê boe̍h-á -The Empty Stocking
故事主角是雙生仔，‘’予大人認為‘’無乖--ê半暝醒過來看著伊的襪仔滇滿滿，毋閣乖--ê彼个襪仔soah空空。 無乖--ê kā伊的禮物分一半， lok入去乖--ê 襪仔。 隔轉工，無乖ê leh開禮物，襪仔上內底ke 一粒「乖囡仔」徽章。 伊足歡喜紮牢牢，毋過彼粒徽章，只有伊一人知影。 感覺是寫予大人看 ê 故事。若講hō͘細漢囡仔聽，應該會真佮意
Chiong-hòa tâi-tiong ê "un-chha"
Kin-á-jit khì chiong-hòa chhiong-tiān, thàu-chá 7tiám gōa chhut-mn̂g, khiâ 40huncheng ê chhia-têng kàu Hô-bí. Góa lâng chi̍t-ē kàu o͘-ji̍t chiong-hòa kau-kài, sûi kám-siū khì-tiûⁿ thong-thàu, sim-chêng sûi tòe leh chheng-sóng. Sim-lāi mā sûi phû chhut chiâⁿ-si̍t ê kám-siū: Tâi-tiong khak-khak-si̍t-si̍t hoān-tio̍h tē-kài, khì-tiûⁿ oân-choân sī siū sok-pa̍k kah pháiⁿ-mih-á u-jiám--kòe--ê. Kî-si̍t góa tùi Chiong-hòa it-ti̍t lóng chin chheⁿ-hūn, tō sǹg kúi-nā ê góa kah-ì--ê Tâi-gíhó-pêng-iú lóng Chiong-hòa-lâng, góa tùi chit ê siâⁿ-chhī iáu-sī chiok chheⁿ-hūn--ê chheⁿ-hūn. M̄-koh kiàn-pái lâi kàu Chiong-hòa lóng hō͘ góa chiok pêng-chēng koh chhin-chhiat ê kám-siū. Siūⁿ khí siăn-pái kóng lán Tâi-oân loān-loān ê ke-lō͘ kéng-koan, he chiok súi--ê góa mā sī án-ne kám-kak. He tō sī lán Tâi-oân. Chit-má góa tòa ê peng-léng ê siâⁿ-chhī, ta̍k hāng lâng-kang ê chéng-chê, bô-chêng kah hō͘ góa khí-mo͘ ū-kàu bái--ê bái... Ji̍t-pún chéng-chê, soah ū un-tō͘, ah Tâi-tiong....Kám-kak chin bô tùitâng....
Kiaⁿ cha-bó͘-kiáⁿ se̍h-se̍h-liām
Kin-á-ji̍t e-po͘ beh chiap cc pàng-o̍h chìn-chêng, i ê ōe-pit góa iā kah chi̍t-sì-kè, kóaⁿ beh chiap--i, koh siūⁿ tio̍h: 「 Bē-sái！Tńg--lâi nā hō͘ i chit ê kiông-pek-chèng--ê khòaⁿ tio̍h góa bô siu pit, it-tēng ē hō͘ i mē kah beh sí」 kóaⁿ-kín chiàu sek-chúi sūn-sī khioh hō͘ hó, sim-chêng mā tòe leh hó--khí-lâi. M̄-koh, kî-koài neh, góa chit ê chò lâng lāu-bú--ê, soah ē kiaⁿ ka-kī ê gin-a siūⁿ-khì, án-chóaⁿ siūⁿ tō koài-koài. Chit chiah sió pō-liōng chin-chiàⁿ kah i e papa pà-ông-liông kāng-khoánhō͘ lâng kiaⁿ-hiâⁿ. M̄-koh, góa nā siūⁿ-khì, nn̄g chiah liông lóng bô beh hiù--góa, góa sī ū chiah pháiⁿ-miā sī-m̄....Orz Nā chhī tio̍h thiⁿsài hó-io-chhī ê gín-á, sī lâi pò-un--ê. Ah chhiūⁿ gún cc chit khoán--ê, tō sī lâi thó-chè--ê. Khòaⁿ tio̍h i bē-su khòaⁿ tio̍h chè-chú kāng-khoán, kan-ta siūⁿ beh kha-té boah iû, mài khòaⁿ tio̍h siōng hó. Sī kóng, siu ōe-pit hō͘ góa kín-tiuⁿ chit kiāⁿ tāi-chì, mā sī thâu-chi̍t piàn, kám-kak ài chhiò, chò chi̍t-ē-á kì-lio̍k. : )
M̄ chai iáⁿ Sèng-tàn lāu-lâng sī siáⁿ-lâng
Tú-chiah kā sèng-tàn boe̍h-á siu ji̍p-khì siuⁿ-á. Bc: Lí kám chai-iáⁿ sèng-tàn lāu-lâng ùi tó-ūi lâi--ê? Cc: Góa it-ti̍t hoâi-gî sī koán-lí-goân..M̄-koh siūⁿ bô i án-chóaⁿ ji̍p-lâi--ê(Khǹg lé-bu̍t tī sèng-tàn boe̍h-á) Bc: Lí chin-chiàⁿ m̄ chai sèng-tàn lāu-lâng sī siáng? Cc: Góa 9hòe ê sî tāi-khài tō chai-iáⁿ--ah. Bc: Lí 9hòe sèng-tàn lāu-lâng kám ū sàng lí lé-bu̍t? Cc: Ū--ah, niau-á. Bc: ????? Siáⁿ-mih niau-á, góa beh khòaⁿ. Cc ùi pâng-keng the̍h chit chiah chhut-lâi. Bc: Che kám m̄ sī góa khì Tâi-pak(Tâi-oân phok-bu̍t-koán chhut-chhai) bé tńg-lâi sàng hō͘ lí--ê? Cc: Hĕⁿ (Ba̍k-thâu kat-kat thâu oai chi̍t pêng siūⁿ bô, che kám m̄ sī sèng-tàn lāu-lângsàng--i--ê？) (góa mā siūⁿ bô kám m̄ sī góa chhin-chhiú the̍h hō͘ i ê lé-bu̍t?????) Bc: Só͘-í lí chin-chiàⁿ m̄ chai sèng-tàn lāu-lâng sī siáng? Cc chhiò kah chin kî-biāu, kan-na chai koh káⁿ-ná m̄ chai. Cc: Mă, lí tú-chiah tàu-té leh mn̄g siáⁿ??? Góa m̄ chai lí ê ì-sù. (Chiok siūⁿ beh chai-iáⁿ) Bc: Hăⁿ, góa mā bē-kì-tit--ah ^^" (T...
Sè-lâu hōe-chi̍p piàn tōa-lâu
Pún-chiâⁿ góa siūⁿ kóng lán chit tāi bô kái-piàn siáⁿ, té-té kúi-nā tang, í-keng thâu chi̍t keng Tâi-gí kok-hāu--ah....Lán kám sī m̄ sī ē-tàng ǹg-bāng, kok-kip kàu-io̍k kai-tōaⁿ lóng ū Tâi-gí ha̍k-hāu, kàu Tâi-gí tāi-ha̍k. Tâi-gí ê khó-chhì seng-ha̍k thé-chè...Chiok ǹg-bāng, Tâi-oân-lâng ê seng-oa̍h, koh chài chit ê thó͘-tē hoân-êng khui-hoe--chhut-lâi.
外星少女回家攻略
這漫畫誠唌人目！台華雙語 ê 台北 高中生，去拄著外星美少女，想辦法chhōa伊揣著轉厝 ê 方法。 細節lóng是台灣 ê 風景，予我熟似 ê 『既視感』，透過高中生講這个故事，加足好看！ 短短ê單行本，有趣味，閣有鹹酸苦汫。予我真意外。意外 ê 新台灣 青春 ê 氣味。 《外星少女回家攻略》
Hó gia̍h ê cha-bó͘-kiáⁿ
我將khǹg 2 暝 ê 衫 ùi 烘衫機péng出來，閣抾著 2箍(阮兜無人leh用現金，檢采是我袂記得提出來--ê)，送hō͘CC，CC佇我kā衫收入thàng-suh ê 時kā2箍包佇襪仔講足好耍叫我看。 我：錢莫提來耍，ài收予好才會好額做『好野人』。 CC：我攏收kah足好的，你看！Chia ū saⁿ-chheng-kho͘ (隨ùi對面伊 ê 房間提錢包仔開開予我看，夭壽！收kah遐整齊！！！比我較好額jî-chhiáⁿ kò-sèng mā Chiok『好野』...) 我：你嘛收kah siuⁿ 媠--ah (Chi̍t-ê chîⁿ phah 24 ê kat, lóng bô leh khai, khòaⁿ súi--ê...) 我：借我翕，我欲囥網路展你足好額。啊你錢包仔佗位來--ê？(無啥印象...) Cc：好啊！(錢包是)你予我--ê。 (我無印象neh...Mkoh足適合cc) 我：你今仔日thài雄雄掛手鍊，心情無好喔？ Cc：啊就(用Kí-cháiⁿ比我) 我：我無佇咧你無歡喜喔？毋過我足歡喜--ê neh！(CC笑笑閣受氣假做欲kā我舂) 我學足濟智識閣有足濟台語！(心滿意足) 我 ê CC，大漢毋知會變啥款。應該會足歹對付--ê(？) 我古錐閣活潑 ê ，寶貝查某囝
