Ka-pi poa̍t-á tì bō-á
Thò͘át：Lia̍h tio̍h thò͘-á--ah.
發表文章
萬聖節麭麭
Papa買萬聖節麭麭轉來。 B：貓仔足古錐❤️❤️❤️❤️ 啊這隻是啥？ C：人--ā。閣有『腋毛』～～～～ 彼『腋毛』拖長音，ùi10歲查某囡仔 ê 幼聲講出來，特別溫柔好聽koh古錐❤️❤️❤️ B：『腋毛』我袂曉講。 C：遮按怎講（手比kòe-hīⁿ-khang）？ Kòe-hīⁿ-khang-mo͘ Góa chiok khiáu--ho͘h(*￣︶￣) -- C：我欲kā頭pak落來--ah--ŏ͘。 B：Hó! (想著細漢時我愛食 ê 各種造型 雞卵糕，有銃、有足媠 ê 鳥仔圖--ê，我嘛會食彼古錐 ê 鳥仔雞卵糕，加足有歡喜 ê氣味。毋過，大漢就毋捌閣看過我細漢--ê彼種雞卵糕，足數念。。。。)
Chú kiâm-moâi
Kin-àm chú chi̍t-tǹg o͘-àm liāu-lí, ka-chài bī iáu ē-sái-tit. Cheng kóng beh ko-lê-chhài-si, hoan-be̍h, hiuⁿ-ko͘, ke-nn̄g. Góa khì chhài-chhī-á khòaⁿ tio̍h hoan-be̍h-sún kah bín-tāu mā chò-hóe lām lo̍h-khì chú. Ti-che(Ti-un) ê koan-hē, bah-si kái ke-bah,chhiat chò iù-á. Koh ū âng-chhài-thâu-si. Án-ne eng-kai khah êng-ióng?!
Tâi-oân-ōe, góa ê kin
Kin-á-ji̍t chá-khí chhíⁿ--lâi thiaⁿ tio̍h ta-koaⁿ leh se̍h-se̍h-liām ê siaⁿ, góa kám-kak góa ná-chhiūⁿ tńg kàu sè-hàn a-má tau, pêng-chēng, hoâi-liām ê sî-khong. Gí-giân choa̍t-tùi ū chha, lán nā iōng Tiong-kok-ōe kā gín-á chhī tōa-hàn, i ê jīn-tông tō sī Tiong-kok-ōe. Ka-chài, góa se̍k-sāi lala, hō͘ goa khòaⁿtio̍h bô kâng sè-kài. Góa kah ang kiat-hun, ta-koaⁿ ùi Tiong-kok tńglâi, lóng chiàⁿ Tiong-kok-ōe. M̄-koh, cha̍h-hng chhut-khì chia̍h-pn̄g, se̍h-ke, chí-iàu kah CC chòhóe, lóng chiàⁿ Tâi-oân-ōe, , chiok chū-jiân! chiok hó-thiaⁿ, che chiah-sī lán ê kin！ ta-koaⁿ mn̄g tiàm-oân, óaⁿ bô chheng-khì, beh khì toeh the̍h? he tiàm-oân siàu-liân-siàu-liân khòaⁿ--khí-lâi ke̍k-ke 20thóng hòe, sûi iōng Tâi-oân-ōe hôe ta-koaⁿ, ē the̍h sin óaⁿ kòe--lâi. tī Tâi-pak-siâⁿ chit chi̍t bō͘, it-chhè lóng sī hiah-nī chū-jiân... khòaⁿ hó bô khòaⁿ bái. tńg-lâi Tâi-pak, sī góa chhiong-tiān ê sî-chūn. chhin-chhiūⁿ i-seng kóng--ê, góa sī i thâu chi̍t ê kòen-î kòe-chiat, bián hoân-ló ka-lāi-sū ê lâng. Góa sī hē...
Ká-ji̍t chia̍h hó-liāu, kè-sio̍k chò-kang
Kin-á-ji̍t png ta-ke ê hok-khì khì Si̍p-chí chia̍h hó-liāu koh se̍h-ke. Khòaⁿ tio̍h mo͘-mo͘ kó͘-chui ê pò͘-ang-á tiāⁿ-tio̍h ài phō chi̍t-ē. Hoaⁿ-hí！ Kiàn-pái tńg--lâi ūi-tio̍h thêng-chhia ê tāi-chì leh oan-ke, ū-kàu siān...Khùn bô pá-bîn tō chhut-lâi, lâm-pak óng-ho̍k si̍t-chāi thiám-thâu... Khì chi̍t-ē tian-tò ē-tàng choan-simsiá kong-khò(?) chìn-chêng khiàm ê kong-khò iáu bē pó͘ liáu. Jīn-chin oân-sêng 50%, koh ū chi̍t pòaⁿ, kám-kak ká-ji̍t koh leh chò-kang sī leh....(Ka-kī ài chhit-thô ê gia̍p ka-kī taⁿ...Ài hêng--ê chóng--sī ài hêng...) thâu-khak thiàⁿ...kè-sio̍k sńg, sńg kah boán-ì kè-sio̍k chò-kang... -- Hit óaⁿ peng, sī cc ka-kī chò--ê, ùi peng-kî-lîm-ki kàu lâm chocolate chiùⁿ iā chocolate bí, khòaⁿ khí-lâi chiok hó-chia̍h-khoán❤️
Góa ài lo̍h-hō͘-thiⁿ
Góa bē thó-ià lo̍h-hō͘-thiⁿ, lo̍h-hō͘ tòa hō͘ Tâi-oân hong-hù ê chúi chu-goân. Góa lâi Tâi-pak-siâⁿ siōng pan ê thâu chi̍t kang, siàng-tōa-hō͘, góa kā tòng-chò hoat-châi ê hó kiat-tiāu. Góa bē thó-ià lo̍h-hōthiⁿ, chheng-liâng ê khong-khì, ē-tàng sé tiāu chin chē kòe-thâu jia̍t-chêng ê khì-bī. Góa ài lo̍h-hō͘. Lo̍h-hō͘ sī hó tāi-chì.
台灣人學校-木工課程(做柴尪仔)
2025/9/12(五)參加台灣人學校ê木工課程(做柴尪仔)拖足久，頂禮拜做伙漆色，今仔日總算畫好矣！ 多謝 小拙生活 / 友善環境木作設計 提供珍貴ê木工課程予囡仔體驗。Ùi磨柴角á開始、戮空、彩畫、組合。看起來簡單 ê 程序，逐步lóng無簡單。 多謝對囡仔講台語-台中台語囡仔伴ê家長做伙共學，予台灣人囡仔有純台語 ê 生活環境。 ❤️❤️❤️ 珍貴的台灣人學校，做伙來維持。
像石獅 ê 鯊魚人
(góa leh sńg chhiú-ki, C kā ōe-bīn chiām-thêng mn̄g góa) C：你感覺這个人ê原型是啥？ B：Soa-hî(鯊魚)--阿！ (伊原型是tāu-hū-soa) C：Ĕ(?! khó-lêng bô siūⁿ tio̍hgóa ē chai ?) C：毋過我感覺像chio̍h-sai(石獅)，你看伊的目眉，閣有倒勾的喙齒。Chí-peh-luh(ジンベエJinbe 吉貝爾) Mh，ū sêng tō tio̍h！
煮食功夫進步
50分鐘ùi原型開始，煮一坩飯、一鼎番麥菜頭貢丸湯摻芫荽、一粒高麗菜炒紅菜頭絲煏蒜頭，掛收煞(洗盪、拭灶跤)。我感覺我足gâu<(￣︶￣)/ 煮食時陣，chŏ͘囝寫中國語作業 ê 造句：Mă，你煮了看我寫 ê 造句，我感覺我寫kah足好。<(￣︶￣)/ 多謝序大對我 ê 疼，予我快樂幸福 ê 生活，多謝chŏ͘囝對我 ê 要求，hō͘我變閣較gâu❤️❤️❤️
Bêng-kó͘-ok bô o͘-tó͘-bái.
Sit-hoeh ê hoeh-tiâu iáu bē pó͘ tńg--lâi, kui-ê lâng khong-khong. Chhìn-chhái póe nn̄g--ê, khòaⁿ tio̍h lí-tiúⁿ kûn-cho͘ ū lâng leh thó-lūn têng-á-kha thêng-chhia hông khui-toaⁿ. Ū-lâng kóng sī ū-sim jîn-sū khì liân-sòa kiám-kí--ê. Chit-khoán lâng gún chêng siā-khu mā ū kiám-kí mô͘-lâng che góa chai. Āu--lâi koh iáⁿ-tio̍h ū lâng kóng pôe sī-tōa bān-bān-á kiâⁿ. Koh lēng-gōa khòaⁿ tio̍h koan-sim kong-kiōng khong-kan Pak-tūn-khu pêng-iú hun-hióng Tōa-Tâi-tiong kiàn-siat ê beforAhter siòng-phìⁿ, kóng m̄ chai beh án-chóaⁿ kóng. Before jîn-hêng-tō sè-sè-tiâu, after lō͘ piàn khoah góa kám-kak chiok hó, soah m̄ chai siang-pêng ê chhiū-á, óa chhia-lō͘ piⁿ ê chhiū-á chóng hô ng chhò tiāu, chèng sè-châng chhiū-châng ji̍p-khì......Khòaⁿ in thó-lūn ê lâu-ōe chiah chai, che sī Tâi-tiong chiok bô chù-tiōng chhiū-á ê phó͘-phiàn hiān-siōng,jî-chhiáⁿ koh sī thau-chhò tiāu, in-ūi in mā chai-iáⁿ ē hō͘ lâng mē....= = sng-si̍t-chiat khì Ji̍t-pún Bêng-kó͘-ok, m̄ bat tn̄g tio̍h chi̍t tâi o͘-tó͘-bái...
菜豆仔糜
我呔會感覺今仔日攏佇leh灶跤無閒@@ 下晡總算感覺家己kā冰箱清了，才發覺主委講有自家種ê菜蔬寄佇櫃台欲予阮。どうしよう.... 決定速戰速決，緊共提來煮煮咧。主委講菜豆仔會使炒肉會使做點心菜(涼拌)，嘛會當煮菜豆仔糜，我毋捌食過，隨揣牛--哥(Google)來kā我教。厝lih無影片食材，只好提厝lih便ê材料烏白濫，七á鬥八á，做這項奇妙 ê 味 ê 光明烏暗料理出來。Cheng講好食毋過味足奇怪...XDDD 有好厝邊的新鮮食材，心情攏好起來，加哉有閣煮才想著中晝有金針菇佇烘爐袂記得提出來，若無，後遍kā烘爐掀開，可能會看著真濟菇類家族仔咧kā我擛手😅😅😅😅 有的代誌，想欲做的，猶是想欲做，尤其是來自樸實善良的心意，特別值得珍惜❤️❤️❤️❤️ 影片cheng講ài閘面，本底我已經閘好ah講圖siuⁿbái，我閣重閘一擺，用貓仔伊就滿意--ah
An-hioh, koh chài-seng
Kin-á-ji̍t m̄ chai kám sī chia̍h m̄-tio̍h io̍h, kui ji̍t siāntauhsauh. Cheng tùi chú chia̍h ū chhù-bī, nā bô chit-má pài gō͘ tùi i lâi kóng, siōng ngē-táu. Pàng-o̍h koh ài kóaⁿ khì Tâi-oân-ha̍k. Góa mā m̄ chai sī án-chóaⁿ, kám-kak lî ta̍k-ke jú lâi jú hn̄g... Cha-hng tńg--lâi kè-sio̍k kóaⁿ kang, chhōa Cheng khì hō͘ i-seng khòaⁿ, hāu-chín góa koh leh kóaⁿ kang. Tńg--lâi kè-sio̍k kóaⁿ kàu 11tiám pòaⁿ...,eng-kai sī án-ne goân-khì tōa sit..... "chin hoaⁿ-hí khòaⁿ tio̍h lí" to-siā Phek-tông bo̍k-su ta̍k piàn lóng iōng chhàn-lān ê chhiò-iông hoan-gêng góa. Mā mn̄g góa kám beh ài hoe. Góa chin kahì, nā m̄ sī āu-lé-pài bô tī chhù, góa ē kui khaⁿ poaⁿ tńg chhù.... 3 lúi mûi-kùi kah pek-ha̍p, tútú hó, khǹg tī toh khòaⁿ súi. Sùn-kan sim-chêng mā tòe leh bí-lē khí-lâi. Chin kú bô chhēng choân o͘, chòe-kīn sim chêng kah lêng-liōng kah kē, siūⁿ beh chhēng o͘-saⁿ. Tú-tú hó, mā chiap-siu tio̍h TânOánchâi tiúⁿ-ló kò-pia̍t lé-pài ê hoe. Thiaⁿ kóng hiànsi sī 630<tī m̂ lāi ū chi̍t lúi ...