新舊鞋仔

昨昏買新鞋，五百有找，閣是台灣製造，抾著俗貨有夠歡喜。

轉厝整理鞋仔，才發覺我毋甘穿--ê鞋已經遛皮一雙一雙提出來看...皮 ê 所在 含梢必開...

彼時逐雙攏佇百貨公司用千外箍ê買--ê QQ

一雙伴嫁穿過chi̍t擺，一雙嫁娶彼工穿過就毋捌閣再穿過--ah。烏色--ê毋知是佇佗買--ê袂記得--ah，橫直攏無穿過第二擺，就囥佇紙盒仔一直chhāi踮鞋櫥毋甘穿。  

一方面嘛是因為無閒，我嫁娶彼時是我工課上無閒 ê 時陣，後來生Chengcheng嘛無機會閣穿。

毋甘擲挕捒，嘛是ài擲，就已經害去--ah。按呢就穿咧閣翕最後一擺。本底干焦穿厝內 ê 便衫，翕起來干焦跤好看，猶是去穿一軀洋裝來翕一下好--ah。

買ê彼時差不多54，這馬加十公斤，跤變較肥，險仔櫼袂落 (變大箍 ê 塗炭-á 穿袂落伊 ê 玻璃鞋，按呢敢閣是塗炭á @@？)

佳哉我猶無大箍kah siuⁿ過頭(自我感覺良好)，猶是穿會落，翕媠一下，就kā say goodbye。

順紲kā新鞋嘛翕媠做對照，新舊兩雙鞋，我攏真佮意。舊鞋真無彩，這陣想著唐詩『花開堪折直須折，莫待無花空折枝』，佮意的，毋通藏起來，攏無用著顛倒無彩...

毋才我這陣，學我的女神，足佮意的金仔袚鍊會掛咧。希望媠的物件，會當發揮伊本底 ê 功能，予阮 ê 心，更加美麗。