時代的變化 李孟真 全國語文競賽朗讀文章

家己褒：多謝我的二姊定分享各種代誌予阮知，予我足好的題材，無這款素材，我袂予入選做全國語文競賽的朗讀文章。

會當記錄家己爸母予我料想袂到的過去，實在真有價值https://www.facebook.com/share/p/15gepEVUQH/

時代的變化 李孟真 全國語文競賽朗讀文章 聲音檔 https://youtu.be/_BS8S8lQSsc

第17篇 時代的變化 李孟真https://acrobat.adobe.com/id/urn:aaid:sc:AP:1cdd8312-7f82-4f91-bcfb-fad9e5d13a44

臺中市政府教育局 全國語文競賽專區https://www.tc.edu.tw/page/53bd8f10-a2b1-4039-bf3e-1f31c5fc0368

---

嘉義縣六腳鄉崩山村與雲林縣水林鄉蔦松村，兩村隔著北港溪，早期兩地農民必須渡過河道，到對岸從事農作https://www.facebook.com/100000294933460/posts/3891655514187575/?d=n

---

17 時代的變化 李孟真

佇數位時代，紮一支手機仔隨時就會使上網查資料、揣地圖共咱鬥𤆬路，閣有翕相、攝影功能，記錄影像傳上網，分享予親情朋友抑是網路世界的人看，這是我細漢無網路的年代，料想袂到的發展。毋過我有一个大我十二歲的二姊，伊細漢嘛捌發生一項予我料想袂到的代誌。

這馬網路時行分享古早時代的舊相片，透過掃描抑是翻翕做數位檔案，囥起去網路予人看。有一日，二姊佇網路看著一張古早相片，畫面是人坐竹棑仔過溪，也有牽oo-tóo-bái 坐竹棑仔的。佇彼个猶未造橋的年代，欲過溪著愛坐竹棑仔才通去到外位仔。 二姊講伊細漢的時陣，欲轉去草地，阿爸著騎一隻百五仔的 oo-tóo-bái 載阿母、大姊、二姊佮阿兄，規家伙仔五个人對高雄盤山過嶺，一路硞轉去到雲林。行到嘉義佮雲林之間的北港溪，著愛掛 oo-tóo-bái 做伙坐竹棑仔過溪。彼時二姊猶真細漢，伊坐竹棑仔的時，足驚會跋落溪仔底。過年過節，阿母也捌𤆬in坐火車轉去庄跤。大年大節，逐幫車旅客插插插，阿母會先共囡仔一个一个捒起去車頂才上車。

有一擺，二姊上車矣，阿母佮上細漢的三姊猶佇月台袂赴peh上車廂，火車就起行矣，結局一家伙仔煞坐無仝幫車。二姊無啥會驚惶，伊拍算若無拄著阿母，就坐翻頭轉去高雄。顛倒三姊是真緊張，講驚會揣袂著二姊。彼時火車慢分真四常，阿母 坐後幫車和二姊的車幫相拄，火車擋恬無停入去月台。有人𤆬二姊落車，行對兩台列車中央的鐵枝路去，欲共伊鬥換去阿母的彼幫車予 坐做伙。行佇鐵枝路的二姊才發覺，原來鐵枝路的石頭仔路真歹行，火車閣遐爾仔懸，懸甲伊peh袂起去。

彼擺有真濟人佮二姊仝款，落車行鐵枝路欲換車。檢采真濟家庭也予人拆做兩幫車去，毋管月台、車廂，人濟甲相挨相𤲍。𤲍袂上車的，月台有人會共旅客鬥捒起去車頂。後來阿爸買汽車，政府嘛四界鋪橋造路，愈來愈利便，就免閣遮爾食力盤車過水轉去到草地矣。