Si̍p-chí ê chi̍t kang

Té kha beh tòe tio̍h tn̂g-kha ê kha-pō͘, sió-khóa-á chia̍h-la̍t. Chīn-le̍k tòe tiâu.

Ang beh khì Si̍p-chí ka thâu-chang. Seng tòe tak-ke tōa-ko͘ khì siúⁿ eng-hoe. CC iōng góa ê chhiú-ki hip chin chē súi tô͘, kò͘-tô͘ lóng súi kah！ Thian-seng ê gē-su̍t bí-kám.

Hoe khòaⁿ liáu CC pàng leh tòe ang cháu. Oa̍t-thâu khòaⁿ i bô siáⁿ hoaⁿ-hí, kiaⁿ i háu... M̄-kam. Mk-oh, m̄ sī i háu, tō sī góa háu. Tōa-ko͘ ē kā chiàu-kò͘ kah chin hó, bián hoân-ló.

Tòe leh kín kiâⁿ pòaⁿ-tiám-cheng kàu ka thâu-mo͘ ê tiàm, chiok chē lâng lóng beh hō͘ ûi-it ê thâu-ke kiam tiàm-goân ka thâu-chang, chiah 300kho͘. Koh ka kah chin hó khòaⁿ. M̄-koh lâng siuⁿ chē, ang chē chi̍t khùn tō lâi choân-ke lī-piān-tiàm chhōe góa, khòaⁿ  lâng ka 15hun-cheng, thâu-chêng koh ū 7 ê, án-ne siōng-bô mā ài tán tiám-pòaⁿ-cheng, hòng-khì, lēng-ji̍t chiah lâi, koh kiâⁿ hoan-thâu khì chhōe CC, goân-lâi tōa-ko͘ chhōa cc khì chia̍h tiám-sim, in tú-hó í-keng chia̍h-liáu. Chhut-lâi kóng cc it-ti̍t tiû-tû beh tiám m̄ tiám in-ūi chi̍t poe gû-leng tê tio̍h-ài 130 kho͘. Koh ū hó-chia̍h ê ke-nn̄g-ko.

Cc kā góa kóng leng-tê chiok hó lim, ke-nn̄g-ko chiok hó chia̍h, chiok siūⁿ beh góa mā chia̍h khòaⁿ māi : )  

chhōa i khì hî tiong hî khoàn káu-á niau-á. Koh kah hî-á sńg bih-sio-chhē, si̍t-chāi chin gia̍t-siâu ê gín-áXD

àm-tǹg kah tiong-tàu kâng-khoán chhù--lih  ū tak-ke khoán hó ê hóe-ko. tōa-peh tàu khoán. chia̍h kah chin pá.

---

tńg--lâi ê lō͘ lih, kong-chhia téng, ang kóng i nā lâi chhut-chha lóng sī lâi chit tòng tōa-lâu.

kî-si̍t, CC sè-hàn ū chi̍t  piàn, góa mā bat chhōa i lâi chit tòng chhōe lí.

--

ka thâu-mo͘ hoan-thâu ê lō͘ lih tú-hó thêng âng-teng ê si̍p-lī-lō͘ kháu, khòaⁿ tio̍h Si̍p-chí hêng-chèng tiong-sim.

Ang mn̄g góa: Lán kiat-hun tī chia teng-kì--ê?

Góa chiâⁿ khéng-tēng liâm-mi hôe: sī. Tī chia teng-kì--ê.

M̄-koh gún nn̄g lâng tùi chit ê só͘-chāi chin chheⁿ-hūn...

"Kan-ta teng-kì lâi kòe chi̍t piàn niā" góa pó͘-chhiong.

"Āu--lâi tō lóng tiàm tī Tâi-tiong--ah" ang sòa-lo̍h pó͘-chhiong, góa chiah ì-sek goân-lâi sī án-ne.

Kiat-hun hit-sî khang-khòe siōng bô êng, hō͘-kháu tī Si̍p-chí, m̄-koh ji̍t-siông seng-oa̍h kah khang-khòe lóng tī Tâi-tiong--ah.

Kau-óng hit-sî bat chò-hóe tī Si̍p-chí seng-oa̍h kòe, soah sī chi̍t phìⁿ khàng-pe̍h

Hoàn khí sió sió kì-ek-tiám, sió-khó-á hoaⁿ-hí.

❤️❤️❤️