Khai-ha̍k liâm-mi tú tio̍h 228liân-kà.

Kin-á-ji̍t khai-ha̍k tē it kang ji̍p hāu kà-chheh. Kà liáu tō tú tio̍h 228 liân-kà,  ài siōng khò-pún, koh siūⁿ beh kóng 228, koh kū-le̍k kòenî tú kòe, liâm-mi beh Goân-siau, koh siūⁿ beh kóng Goân-siau....Tâi-oân chêng-jîn-chiat...Koh ài hoah in ê Tâi-gí-miâ...

Góa ū kok-chióng ê soán-te̍k khùn-lân, kiat-kio̍k， tōsī chóng-pau chóng ùn chi̍t-sut-á.

Mā kāgín-á kóng í-siōng ê ōe , hō͘ in liáu kái góa siūⁿ siuⁿchē XD

228 tû-liáu ko-tiong ko-chit ta̍k pan lóng 1 ūi tông-o̍h kóng ē chhut: Cha-chi̍p su-hun, tō bô lâng chai-iáⁿ--ah...Bān-chhian hoe-lúi kāng-khoán ta̍k pan kan-ta 1 lâng chai-iáⁿ chit tiâu koa.

Kok-tiong 1nî-á, bô kà kòe 228, oân-choân bô lâng chai-iáⁿ 228 sī siáⁿ.

Ko-tiong jī nî-á, siōng hó ê pan ê gín-á kóng kok-tiong 1nîá āu ha̍k-kî khò pún ū kà tio̍h, jî-chhiáⁿ liân hiat-chheⁿ tìn-ap lóng ū kóng--tio̍h, hō͘ góa chiâⁿ an-ùi.

Góa kā in kóng góa kóng ê lóng sū-si̍t,  m̄-koh nā tī pe̍h-sek khióng-pò͘ sî-kî,  āu-lé-pài lín tō khòaⁿ bē tio̍h góa--ah, in-ūi góa hông siau-sit chhōe bē tio̍h--ah , gín-á mā tòe leh chhiò XD

chò kàu chi, sui bóng chò kong-tek, m̄-koh ē-tàng kā hiah chē ha̍k-seng kóng tio̍h kòe khì chia ê tāi-chì, kóng tio̍h Tâi-oân bûn-hòa. Góa kám-kak CP chin koân. 

CC kiò góa kà-chheh ài ka-iû, án-ne chiah ē ū jú chē lâng o̍h ē-hiáu Tâi-gí. Kî-si̍t, góa chit-chūn ê chōng-thài, ka-siōng ha̍k-seng gín-á ê thêng-tō͘, góa sī choân Hôa-gí leh kà-chheh,  seng kā in kóng ì-sek, góa kám-kak khah iâⁿ siá in khòaⁿ bô ê Tâi-gí-bûn, m̄-koán Hàn-jī Lô-má-jī, tùi āu-tōaⁿ pan ê gín-á lâi kóng lóng sī hū-tam.

Kin-á-ji̍t 6chiat khò kà liáu, chéng-lí chi̍t-ē, kóaⁿ khì chiap cc hā-khò tńg chhù, koh khì kok-li̍p tāi-ha̍k ngó͘-choan. 

Góa kā angang kóng  kin-á-ji̍t kà-chheh siang-thâu cháu, góa kám-kak ùi tē-ge̍k kiâⁿ khì kàu thian-tông.

Angang m̄-kam góa  án-ne chhau, chhù-lāi ang-kiáⁿ lóng bô kò͘-hó. M̄-koh, góa iáu sī, siūⁿ beh si̍t-chiān góa ka-kī...Chiok hân-bān, iáu sī siūⁿ beh si̍t-chiān góa ka-kī...sîn-tūi-iú angang tī leh, sió sió sîn-tūi-iú cc tī leh, chit-má thiaⁿ in tī kheh-thiaⁿ chò-hóe leh phah switch sin bé ê tiān-tōng. kán-tan thiaⁿ-tio̍h in hō͘-siong thuh-chhàu koh hoaⁿ-hí ê siaⁿ, kám-kak chiok hēng-hok.

Tâi-oân lâng ê siăn-pái--ah. Ū lín iōng sìⁿ-miā ōaⁿ--lâi gún ê hēng-hok. Góa chò chi̍t-ê Tâi-oân-lâng kiáⁿ-sun, hēng-hok bô-pí-chí.