Chin ū kui-kí ê pan-kip

Téng chi̍t chiat khò sī hân-ká thâu chi̍t lé-pài ê pó͘-khò, koh lâi tō hioh kà kòe nî, pêng-iú kóng beh hō͘ gín-á siá chhun-liân, góa mā tòe leh hō͘ in siá.

Cha-hng khai-ha̍k tē 1 piàn ji̍p hāu siōng-khò, khòaⁿ tio̍h khì-chhia kho ê kàu-sek chiân-mn̂g tah in hit kang góa hō͘ in siá--ê chhun-liân, hō͘ góa kám-kak chiok hoaⁿ-hí, Siōng khò khiā tī káng-tâi chiah khòaⁿ tio̍h goân-lâi kàu-sek āu-mn̂g mā tah nn̄g tiuⁿ, phah-sǹg hā-khò beh kā hio--lo̍h-lâi, m̄-koh ta̍k piàn lóng leh kóaⁿ tiûⁿ soah bē-kì-tit. 

Āu kái chiah kā pó͘ hip khí-lâi.

Kin-nî ê khì-chhia kho ke chiok ū kui-kí, pan-tó chhōa liáu hó mā ū chha, chit pan mā sī góa thâu chi̍t pan siōng khò koh ài thǹg ê-á ji̍p kàu-sek ê pan-kip. Pún-té ha̍k-seng gín-á koh ū chún-pī múi chi̍t kho-bo̍k ê chhián-thoa-á hō͘ lāu-su. Jî-chhiáⁿ koh sī choan-jîn siang-chhiú sàngkòe lâi hō͘ lāu-su. Chin-chiàⁿ sī beh chò ko-kip khì-chhia ho̍k-bū--ê tō tio̍h！

Thǹg ê siōng khò, chin-chiàⁿ ke khah ū kuik-i, kok-tiong-pō͘ mā sī án-ne-siⁿ.

Ji̍t-pún-lâng ha̍k-hāu siōng-khò ê kám-siū, khó-lêng mā sī s-nán-ne(?)