Khí ke-bó-phôe ê kiaⁿ-hiâⁿ

Gún pâ thâu-chi̍t pái hông chà-phiàn, sī in-ūi góa ê koan-hē. 

Chit-má iáu-leh phah koaⁿ-si, in-ūi 60hòe tông-sū kâng-nî hông chà-phiàn, kin-nî peh-goe̍h hô-kái, tùi-hong goān-ì hun 10 kî hêng chîⁿ(Kî-si̍t pī-kò mā sī hō͘ Tiong-kok--ê lī-iōng...) tông-sū ê koaⁿ-si ū kó͘-bú tio̍h gún. Góa bîn-á-chài beh lâi-khì chu-sûn hoat-lu̍t hû-chō͘ lu̍t-su siông-sè ê koaⁿ-si liû-têng.

Hoan-thâu hian-tio̍h pâ hông chà-phiàn tong-kang ê kì-lo̍k, goán chai-iáⁿ chà-phiàn hit-kang ê chú-sî(Chái-khí chi̍t tiám) bāng-kìⁿ kah pă iú-koan ê ok-bāng, chhù--lih pòaⁿ-mî mn̂g-kháu-tōa-khui, mn̂g, án-chóaⁿ koan to koan bē khí-lâi, bāng-lih pâ kóng bô iàu-kín, góa soah sim-lāi chiok kiaⁿ, chiok kiaⁿ ū chha̍t-á thàn ki thau mi̍h-kiāⁿ. Chhíⁿ kòe--lâi.

Koh-lâi tong-kang àm-sî, chiap tio̍h pâ hiông-hiông khà tiān-ōe hō͘ cheng-cheng, i m̄ bat leh khà tiān-ōe hō͘ góa, koh khah bián kóng sī cheng-cheng....

Hit ê ok-bāng, chit-má hoan-thâu khòaⁿ, hō͘ góa khí ke-bó-phôe...

M̄ bat leh liân-lo̍k, hiông-hiông lâi ê ok-bāng koh piàn-sêng chiâⁿ-si̍t ê ok-bāng....

Kám kóng, che tō-sī só͘-ūi ê, pē-á-kiáⁿ sim liân sim? Khòaⁿ bē tio̍h ê sè-kài, hō͘ góa kám-kak chin kiaⁿ-hiâⁿ. M̄-sìn, mā bē-ēng-tit.