Cháu chiok bān ê cc

Cha-hng pài-gō͘ sī cc ha̍k-hāu ūn-tōng-hōe, chêng iù-tī-hn̂g gún tō lóng ē khì chham-ka. Chit piàn tú-tio̍h hông-chai-sū pôe-hùn bô hoat chham-ka.

Cc chiok siūⁿ-beh góa khì khòaⁿ i thiàu tōa-hōe chhau kah sòa-cháu. Chai góa ê lióng-lân, i kóng: Bô iàu-kín, lí ē-tàng khòaⁿ ti̍t-pò.

Chhut-mn̂g sî iáu koh thê-chhéⁿ góa 1piàn, ū ti̍t-pò thang khòaⁿ : )

---

góa choan-sim siōng-khò, tńg--lâi papa kóng kin-á-ji̍t cc hông pà-lêng, khòaⁿ i ū siūⁿ-beh kóng--bô.

Bc: Án-chóaⁿ hông pà-lêng?

Cc: Ah tō góa cháu siuⁿ bān, sòa-cháu liáu chiok chē tông-o̍h ûi kòe-lâi koài góa cháu siuⁿ bān hāi in pan lo̍k-tē (Ī-sài sī tē jī miâ, jî-chhiáⁿ sī in-ūi ū lâng poa̍h-tó ka bió-sò͘, chèng-sek-pí-sài tē 3 miâ)

bc: Ah lí hō͘ kúi ê lâng jiok kòe?

Cc: 2 ê.

Bc: Lí kin-á-ji̍t cháu khah bān?

Cc: Pêng-siông tō lóng cháu chiok bān--ā. (khin-sang chiap-siu i ka-kī ê bān)

---

ē-kì-tit kū-nî sòa-cháu, i koh oa̍t-thâu kā lâng khòaⁿ, chitê gín-á si̍t-châi ū-kàu sim-sek. Kok-chióng chōng-hóng lóng ū. M̄-koh chit-má i chin gâu chò chū-chāi ê ka-kī, khòaⁿ tio̍h mā kám-kak chiok hó.

Góa mā hi-bāng góa ū i chit-khoán, chū-chāi ê sim-chêng : )

---

tô͘phìⁿ sī ūn-tōng-hōe tong-kang thê-chá 7:20 chhut-mn̂g beh khan-chhia chài cc khì ha̍k-hāu, thêng-chhia-tiûⁿ góa ê ki-chhia piⁿ--á khut chi̍t chiah ū kha-khoân ê hún-chiáu. M̄ kiaⁿ lâng kó͘-chui kah！