Bo̍k-hui tēng-lu̍t

Góa thó-ià bo̍k-hui tēng-lu̍t.

Cha-mê khoán pau-ho̍k-á, kā chek tī phāiⁿ-á ê mi̍h-kiāⁿ chóng péng chhut-lâi chéng-lí-li--leh.

Chi̍t phìⁿ ūi-seng-mî, siūⁿ kóng phāiⁿ-á ē-tàng kiám-chió--ê tō kiám-chió, kiám-khin tāng-liōng, mā siūⁿ kóng goe̍h-sū chiah lâi bô gōa-kú niā, èng-tong iōng bētio̍h, tō hē tńg--khì góa e̍k-keng-á tû-á lāi-té, kah ōe-seng-mî pī-iōng-phín chóng khǹg chò-hóe.

Cha-mê beh tēng kin-á-ji̍t chái-khí ê ko-thih phiò í-keng tēng bô, hoâiⁿ-ti̍t kàu Tâi-pak khiā chi̍t-sî-á tō kàu--ah. Kiat-kio̍k 9tiám gōa kàu-ūi, chiah chai siang-gí kàu-àn ê pan-chióng hōe-tiûⁿ kah Tâi-oân kàu-io̍k-kho-ki-tián kâng hōe-tiûⁿ. 9:30 chiah khai-hòng chhiúⁿ-siong ji̍p-tiûⁿ. Góa ji̍p-khì hō͘ tòng--leh, kóng 10tiám chiah khai-hòng it-poaⁿ bîn-chiòng ji̍p-tiûⁿ. Ùi 7tiám pòaⁿ chhut-mn̂g, phāiⁿ pit-tiān kah ke-hóe ê phāiⁿ-á, tāng-hoaih-hoaih...="= góa í-keng khiā 2tiámpòaⁿ cheng--ah. Kha chiok sng, io mā bô sóng-khoài, pan-chióng hōe-tiûⁿ chiah sè-sè-khu-á...Chhiam-tò ê toh-á mā sī, koh ū kî-thaⁿ kè-ōe ê kàu-àn chóng chò chi̍t kái pan-chióng, ta̍k-ke chóng pâi-tūi tán leh chhiam-tò. Góa sǹg khah chá kàu--ê, chhiam tò liáu-āu seng khì piān-só͘, kā chē-ūi chi̍t tiám âng-tiám lâi-hôe chhit kúi-nā pái chiah chhit chheng-khì, pàng-jiō iōng ōe-seng-chóa chhit soah khòaⁿ tio̍h ōe-seng-chóa chhit--kòe ê só͘-chāi ti-koaⁿ-sek... Kā oa̍t-thâu khòaⁿ bé-tháng, iáu-siū！ Chi̍t chōa âng-hoeh tī bé-thángchúi lāi-té, goe̍h-sū kèng-jiân thu̍t-jiân-kan lâi pò-tò...Góa thó-ià bo̍k-hui-tēng-lu̍t. Cha-mê chiah kā ōe-seng-nî ùi phāiⁿ-á the̍h chhut-lâi....="=

kiaⁿ chi̍t-ē chhiú-ki-á lâu tī piān-só͘-keng bē-kì-tit the̍h chhut-lâi, ka-chài hoan-thâu tńg-khì iáu koh ū tī--leh(Góa ko-tiong ū chhiú-ki-á lâu tòa ōaⁿ-saⁿ-keng phàng-kìⁿ ê kì-tî...) Sè-bō͘ hiah-nī-khoah, hū-kīn koh bô lī-piāntiàm, góa ná kiâⁿ ná kám-kak góa sin-khu ē-té ê hoeh koh lâu--chhut-lâi...="=

góa pit-su ài chhōe lâng tàu-saⁿ-kāng, beh chhōe siáⁿ-lâng? Khòaⁿ khòaⁿ leh, kiaⁿ chhìn-chhái chhōe hōe-tiûⁿ lāi-té ê lú-sèng, ē hông tòng-chò koài-lâng ah-sī pián-sian-á, chòe-āu koat-tēng khì chhiam-tò-tâi chhiáⁿ in tàu-saⁿ-kāng. Tú-hó chhiam-tò mā chhiamkah chha-put-to--ā. Góa chhōe siōng piⁿ--á ê me-me.

：Pháiⁿ-sè, kám ē-tàng kā góa tàu-saⁿ-kāng chi̍t-ē?

：Kám sī beh tàu hip-siòng? (Hōe-tiûⁿ chin chē lâng beh hip-siòng chò kì-liām)

：Góa mens hiông-hiông-lâi, m̄-koh góa bē-kì-tit chah...(Ōe iáu-bē kóng soah)

：Tú-hó góa ū. Piān-só͘ ùi hia oat--kòe tō sī--ah (I ùi chhiâ-āiⁿ ê sûi-sin sè-kha sûi thiu ōe-seng-mî hō͘ góa, koh kā góa chí-sī góatú-chiah khì ê piàn-só͘ hong-ūi chiokkám-sim) 

：To-siā！(Chiap tio̍h ē-tànghông-chí góa kè-sio̍k lāu âng-chúi ê ōe-seng-mî hō͘ góa kám-tōng kah！)

sūn-lī khì kàu piān-só͘, lāi-khò͘ kèng-jiân í-keng tâm kah (Chhi-chhám QQ) ka-chài kan-ta tò͘ tio̍h an-choân khò͘. Ōe-seng-chóa chhit 3piàn , kāng-khoán tâm-tâm QQ m̄-koán--ā, tán tńg chhù chiah lâi sé--ah.

Bô-êng kui-kang, ōeseng-mî mā tòng kui kang(Khó-lêng hoeh-liōng mā bô it-ti̍t lâu..)

ùi Tâi-pak lo̍h-lâm, koh tńg kàu Tâi-tiong í-keng àm-sî 9tiám, kóaⁿ-kín hiaⁿh saⁿ beh sé sin-khu. Khò͘ thǹg--lo̍h-lâi, sé an-choân-khò͘, sé lāi-khò͘, lâi-lâi-hôe-hôe chhio̍k kúi-nā táu, chiah chóng sǹg kā hoeh-jiah sé--khí-lâi. Ná sé ná siūⁿ tio̍h bat thiaⁿ tio̍h ko-tiong tông-o̍hleh khai-káng kóng i lāi-khò͘ bak tio̍h goe̍h-keng, kui niá khò͘ tō tàn-hìⁿ-sak--ah. Góa sim-lāisiūⁿ ū-kàu thó-chè, chit-chūn kāng-khoán án-ne siūⁿ. Kám m̄ sī sé-sé--leh tō hó? Khó-lêngin tau khah hó-gia̍h, bé sin--ê khah kín. Góa sī ē-tàng iōng tō iōng, tō sǹg lah-sap, ē-ēng-tit iōng, góa mā kāng-khoán pó-sioh kah!

Tui-kiû oân-bí ê lâng...Chin pháiⁿtàu-tīn? Hoān-sè, in tian-tò kám-kak gún chiah pháiⁿ tàu-tīn. Lah-sap kah...?

kóng kah loh-loh-tn̂g, beh kóng--ê goe̍h-sū kā góa kiaⁿ tio̍h sū-kiāⁿ chóng sǹg kóng-liáu. Sǹg-sǹg--leh, góa kòe-khì chiok chún-sî lóng 28kang. Kòe 40hòe liáu, chiu-kî khai-sí sok-té. Téng kò goe̍h chha 26kang, chit kò goe̍h, kèng-jiân sī 24kangtō lâi--ah ="=

chit khoán khùn-jiáu, m̄ sī lú-sèng, choa̍t-tùi thé-hōe bē tio̍h. M̄ chai lâm-sèngkám ū lūi-sū ê khùn-jiáu? Khí-chhio kám ū sǹg? Che mā sī lú-sèng choa̍t-tùi bô hoat thé-hōe ê khùn-jiáu?

M̄-koh pí khí-lâi, ē-sin lâu-hoeh-chúi chhut--lâi, iáu-sī khah khióng-pò͘. 

Bē kì--tit i án-chóaⁿ kóng--ê, lán Tâi-tiong ū tì-hūi ê 5hòe gín-á tāi-iok sī án-ne kóng: he sī sèⁿ-miā.

Hêng-iông kah chin tàutah, múikògoe̍h, tán bē tio̍h kah cheng-chí siong-gū ê nn̄g, sit-khì sìⁿ-miā, chŏaⁿ án-ne tòe hoeh-chúi lâu cháu...

Lú-sèng。It-seng ē ū 400 lia̍p chó-iū ê nn̄g pâi--chhut. Beh chiâⁿ chò chin-chiàⁿ ê sìⁿ-miā, 400/1, si̍t-chāi chin bô kán-tan neh...