Tōa-chhiūⁿ chi̍t-ke-hóe-á

 Chóng sǹg koh ū sî-kan lâi hō͘ góa kóng hùi-ōe tháu-sim-khùi, kóng hùi-ōe chiok kái-ut❤️


cha-mê pē-á-kiáⁿ nn̄g lâng chē tī kheh-thiaⁿ leh chhiúⁿ phah-hù(puff), pa-pa kóng beh chia̍h nn̄g chhùi, chi̍t chhùi tō kā Cheng chhiú thâu--ê chia̍h liáu, nn̄g chhùi tú 2 lia̍p, 1a̍p 4 lia̍p chhun 2 lia̍p. Cheng ai-ai-kiò.


Khòaⁿ pa-pa phîphî kā cheng chhòng-tī, chiâⁿ hó-chhiò. Sùn-kan, góa khòaⁿ tio̍h chit chūn Cheng iū-koh tōa-hàn ê bīn-iông, chiok sêng pa-pa, sui-jiân chêngchhut-sì tō sī khek pa-pa ê bīn...


BC: Cheng jú tōa-hàn jú sêng papa--ah. Nā thâu hām papa kāng-khoán tōa lia̍p, tō sī cha-bó͘ pán-pún ê papa.


PP: I pún-té tō sêng góa, kám-kóng tōa-hàn tō ē sêng lí, m̄ chai leh siūⁿ siáⁿ...


BC: Góa sè-hàn kah gún pâ kâng bīn-bô͘-á, tōa-hàn tō sêng gún má(Ma-ma). (Seng-oa̍h keng-giām bô kâng?)


m̄-koh khòaⁿ che ki-in, beh sêng góa sī khah khùn-lân--ah. M̄-koán kò-sèng a̍h-sī gōa-piáu, Cheng oân-choân chéng tio̍h papa...


---

kin-á-chái-khí beh khùn-chhíⁿ hit-sî phû-chhut hām papa iáu-sī lâm-lú pêng-iú sî tông-ki, pêng-siông-sî khang-khòe chin thiám, gún lóng chò-hóe pó͘-bîn. Tī 33 chànlâu ê Mô͘-thian-tìn tòa 12 lâu hn̄ghn̄gkhòaⁿ Tâi-pak chhī-khu. He kéng-sek chiâⁿ hó. Khùn kah pá, sin-piⁿ ū bí-lē ê ài-jîn-á pôe-phōaⁿ. Khin-po̍h ê thang-nî, hō͘ lâm-hong chhoe-khí, e-po͘ khin-pe̍h ê ji̍t-thâu kong tòe thang-nî phāng siā ji̍p-lâi iu-àm chheng-liâng sù-sī ê siang-jîn-pâng. He sī góa sim-lāi siōng-kài ì-ài ê ōe-bīn, góa siōng kài hēng-hok ê sî-kng.

---

chhíⁿ--ah khòaⁿ tio̍h Cheng ê bīn khùn kah chin lo̍h-bîn. Cheng iū-koh tōa-hàn--lo͘h, he bīn í-keng kah góa pêⁿ tōa... Góa ná-chhiūⁿ leh kah papa khùn--leh.

Kā phō leh, sèsè-chiah--á, góa sim-ài ê kó͘-chui--ê. Papa mā sī góa sim-ài--ê kó͘-chui--ê, m̄-koh khah tōa-chiah. 


Papa kóng góa tōa-chhiūⁿ, téng piàn bô-sè-jī ta̍h tio̍h i ê kha, kā cheng kóng i hō͘ tōa-chhiūⁿ ta̍h tio̍h. Cheng nā hō͘ góa ta̍h tio̍h, góa mā ē kóng hō͘ tōa-chhiūⁿ ta̍h tio̍h--ah.


Nā kóng góa tōa chhiūⁿ, cheng tō sī sió-chhiūⁿ.


Ah papa leh?

"Papa sī chiau tōa-chhiūⁿ" cheng án-ne kóngXD


Gún sī tōa-chhiūⁿ chi̍t-ke-hóe-á wwwww 2025.11.17 siá-chok




留言

張貼留言

這個網誌中的熱門文章

Hō͘ lâng gō͘-hōe ê hoán-èng

圖片
Pē-á-kiáⁿ nn̄g lâng hō͘-siong bô sìn-jīm, tī hia tap-chhùi-kó͘, hō͘-siong kóng tùi-hong pe̍h-chha̍t.  Góa thiaⁿ chò "pe̍h-chhài", kā kóng sńg-chhiò kóng nn̄g ê(Châng) pe̍h-chhài. (Kiáⁿ chhùi-kak khiàu--khí-lâi) Chit piàn ōaⁿ papa jīn-chin--ah kóng i chiâⁿ bē sóng, i bô kóng pe̍h-chha̍t. (Hăⁿ!?) ：Góa m̄ sī leh kóng lí pe̍h-chha̍t. Góa sī leh kóng ū nn̄g ê pe̍h-chhài. (Kiáⁿ chhùi-kak koh khiàu--khí-lâi, hoaⁿ-hí ê bīn khòaⁿ góa) ：ChengCheng thiaⁿ ū leh chhiò. (Papa bô siūⁿ beh chhap--gún) (pe̍h-chha̍t, hō͘ lâng gō͘-hōe kóng pe̍h-chha̍t, goân-lâi hoán-èng sī án-ne bē-sóng...Hmh...)
閱讀完整內容

朋友厝裡的WiFi暗號

朋友厝裡 ê WiFi 暗號 (密碼) 是 「976103987102」 我問伊：「暗號lò-lò長 你記會起來？」 伊：「九九合數 (乘法) 你會曉--無？」 我：「會啊」 伊： 「若按呢你已經背起來--矣」 我：「hăⁿ？Khàu-iau！閣有影！」 網路看著--的，kā譯做台文。
閱讀完整內容

Tâi-oân-ōe, góa ê kin

圖片
Kin-á-ji̍t chá-khí chhíⁿ--lâi thiaⁿ tio̍h ta-koaⁿ leh se̍h-se̍h-liām ê siaⁿ, góa kám-kak góa ná-chhiūⁿ tńg kàu sè-hàn a-má tau, pêng-chēng, hoâi-liām ê sî-khong. Gí-giân choa̍t-tùi ū chha, lán nā iōng Tiong-kok-ōe kā gín-á chhī tōa-hàn, i ê jīn-tông tō sī Tiong-kok-ōe. Ka-chài, góa se̍k-sāi lala, hō͘ goa khòaⁿtio̍h bô kâng sè-kài. Góa kah ang kiat-hun, ta-koaⁿ ùi Tiong-kok tńglâi, lóng chiàⁿ Tiong-kok-ōe. M̄-koh, cha̍h-hng chhut-khì chia̍h-pn̄g, se̍h-ke, chí-iàu kah CC chòhóe, lóng chiàⁿ Tâi-oân-ōe, , chiok chū-jiân! chiok hó-thiaⁿ, che chiah-sī lán ê kin！ ta-koaⁿ mn̄g tiàm-oân, óaⁿ bô chheng-khì, beh khì toeh the̍h? he tiàm-oân siàu-liân-siàu-liân khòaⁿ--khí-lâi ke̍k-ke 20thóng hòe, sûi iōng Tâi-oân-ōe hôe ta-koaⁿ, ē the̍h sin óaⁿ kòe--lâi. tī Tâi-pak-siâⁿ chit chi̍t bō͘, it-chhè lóng sī hiah-nī chū-jiân... khòaⁿ hó bô khòaⁿ bái. tńg-lâi Tâi-pak, sī góa chhiong-tiān ê sî-chūn. chhin-chhiūⁿ i-seng kóng--ê, góa sī i thâu chi̍t ê kòen-î kòe-chiat, bián hoân-ló ka-lāi-sū ê lâng. Góa sī hē...
閱讀完整內容