丹娜絲風颱尾，騎o͘-tó͘-bái走長途

 早起醒來足躊躇，風颱tú過，這陣掃風颱尾，雨落遐大不時閣霆雷公，敢欲出門...

Chŏ͘囝醒來kā問，敢有欲綴我去彰化。細漢頭家開始問我騎車偌久，坐車偌久。我kā講了，講：Nā ū chhia tō hó--ah...

分析了猶是感覺騎車較方便，按呢才會當去食chŏ͘囝足期待 ê 肉丸。11點外出門，落小雨感覺欲好天ah，感覺幸運。

毋過烏日、彰化田庄 ê 幾若段大路小路較低 ê 所在，水淹kah足深，我攏足驚我o͘-tó͘-bái顧路(佳哉是電動車無煙筒管會倒灌入去(？)足刺激，囝講有夠好耍！！！！

我：這落雨天才有--ê喔～～～
囝：而且ài騎車，閣ài穿淺拖才敢受會著水噴起來ê 冰涼(快感)，chiok sóng--ê！！！

轉來 ê 路lih已經6點，欲暗仔下班時間車濟，轉到台中，雨水ná天頂水庫ê水門全開，ná水沖，雨足猛。毋過，足好耍！落雨天而且ài風颱尾這款天，才拄會著喔！

傍Le̍k-hiân老師 ê福氣，阮才有這款遮爾刺激好耍 ê 體驗XD nā毋是為著你ê課，阮就佇厝裡雙雙做宅女ah XD 來到彰化園區入口機車停車場，車插好，欲入去，有小小掣流，A-Chêng佇hia耍一時á，koh入親子館半點偌鐘，耍到欲兩點準備簽到，才發覺完全記毋著時間XD 佳哉無遲到真久，簽到櫃台有準備予囡仔 ê 畫圖紙kah畫筆，會當暫時擋一下。

先講大綱原則，閣來分組實作，無仝人做伙討論真正足有收穫！足久無頭疼，今仔下晡自頭疼kah尾無做筆記，算--ah，至少今仔日和chŏ͘囝攏足歡喜！嘛聽著Le̍k-hiân的課，足有價值ah。