台語版 = 台灣本位動畫電影《諸葛四郎-英雄的英雄》

其實我根本毋捌諸葛四郎，嘛對伊的畫風無趣味。毋過，對台灣文化無興趣的朋友，講這齣好看，我就想欲招囝做伙去，進前招袂振動，這遍用chhoah-peng共唌，總算頕頭答應陪我去。

去才知，諸葛四郎-童年漫畫 

基金會足用心，董事長葉佳龍，將老爸葉宏甲1958-1970年間親手畫落來的漫畫諸葛四郎佇1960年代想欲轉做動畫 ê 夢，因為2017遇著紙風車看著新世代的英雄，想著美國超人、日本原子小金剛攏是英雄故事，促成葉佳龍決心做這部3D動畫電影。

何信翰教授講「記持」嘛是文化 ê 一部份。

20世紀ùi平面 ê 動漫畫人物，來到21世紀變成做3D的人物，毋但回憶細漢時仔 ê 記持，閣加入新時代 ê 元素，予過去 ê 英雄，又閣活起來！

看電影進前，先聽主題曲，看起來是10捅歲 ê 少年囡仔組樂團主唱，台語是主歌詞，濫一兩句華語、客話kah英語。主題曲旋律做了好聽，koh以台語本位濫多元語言 ê 歌詞，予我真佮味。主題曲放了董事長葉佳龍講伊細漢蹛客人庄，老爸(葉宏甲)是台灣人，老母是客家人，毋過，爸母佇厝lih是用日本話咧溝通。阿公是駛火車的經濟猶袂䆀，毋過白色恐怖老爸予掠去，阿公用真濟chîⁿ-gîn交關才kā老爸接轉來。老母鼓勵老爸學漫畫，老爸畫出彼个時代 ê 英雄。

這齣電影，頭起先，我毋是蓋佮意，因為故事是ùi親像中國帝王皇宮 ê 背景起鼓，最近我看中國封建實在看kah足siān。

毋過，這只是背景niā-niā，我感覺故事像《Shrek史瑞克》有舊的元素，嘛加入現代突破刻板印象的元素，文言用語、現代用語、時事話仁逐項有，故事 ê 發展到尾，我險á感動kah哭出來 (我是愛哭--ê, 點著我感動 ê 穴道我就會擋袂牢 XD)

重點重點！是全台語配音+全台文字幕，配音翻譯真鬥搭！予我看kah足紲拍！

看kah欲結束ê時，我深深感受tio̍h這齣電影，無論劇情安排抑是畫作各項細節，攏無輸予外國大廠 ê 動畫電影。

「這  是  咱  台  灣   製   造 neh  ！ 」

我心內按呢感動kā我家己講！

電影欣賞了，葉董事長簡單介紹in 老爸，閣有這齣人物設定，轉3D，予每一个細節攏會振動，才閣予行路，閣有請紙風車來演動作。

簡單講了就是有獎徵答時間，阮囝較bih-chhiu毋敢回答問題(大部份囡仔限定回答，ah我是記持䆀看了就袂記得，毋才這馬咧做記錄XD)，若無禮物是誠豐沛毋驚人領：usb電影、規抱 ê 漫畫、海報、尪仔標冊閣有T-shirt。

有獎徵答ê簡報嘛做kah足媠，予囡仔閣一變複習電影重要 ê 細節！

人人有一本手冊，看著手冊頂面的通關密語是用唐詩改編的才知，台語版的配音嘛有修改做在地化的通關密語，莫怪我咧看這齣台語動畫電影就感覺足台灣本位，優雅、文言、在地口語化、國際化閣趣味！

朋友--ah，董事長講in有捐usb16支hō͘桃園圖書館，會使借來觀賞。若別縣市--ê，最近閣有活動，敬請注意，無看過--ê會使去看，有看過--ê足佮意--ê會使閣去看，阮今仔日這場著大獎提著usb--ê sui-jiân sī Hôa-gí家庭，毋過媽媽講是諸葛四郎大粉絲，有看過舞台劇這遍閣是第二遍來欣賞電影矣，會當著大獎，嘛是因緣註定啦！