台語雙語對大腦真補／埔鹽 順澤宮 冠軍帽 kah 販仔

1. 咱ài知的雙語意識：講台語，對咱大腦真補！

罕得super idol 劉承賢老師來中部演講，掠準佇彰化園區，到位問櫃台才知佇Po͘-iâm(埔鹽)Tāi-iú siā-khu(大有社區)活動中心。(⁠ ⁠╹⁠▽⁠╹⁠ ⁠)

騎30外分koh30外分。到位揣無入口，好心溫純 ê 過路人 (口語障礙者) kā我報路，問我啥代

kā講今仔日有老師ùi台北落來演講欲去聽，問伊敢欲去，就做伙入來。門一下開開，oah，序大22人(？)坐滿滿，注心聽課，年歲總加應當1000歲！來遮講予專心認真 ê 序大知，上蓋會和！

散學一位序大kā我問後禮拜敢閣有？

2. 和super idol合影

課堂下課時間揣老師合影。

「阿媽，麻煩你kā我鬥翕相。」揣離我上近 ê 阿媽kā 問

「我袂曉翕，你請會曉翕 ê kā 恁翕。」 阿媽輕聲講，伊足驚翕袂好，古錐 ê 模樣，予我毋甘kā這个任務，對這位阿媽來講是重大 ê 任務交代予伊。

承賢老師講咱家己翕就好，歡喜❤️ 看著idol我緊張kah，想著頂一遍和閩南狼做伙翕嘛是這種緊張 ê 心情。佮閩南狼翕了，伊閣真中國官方tek，伸正手出來欲和我握手！這陣想起來，後改嘛我欲學閩南狼按呢握手（毋是中國人，毋免！）

3. 燒烙 ê 社區關懷據點。

展覽區展示作品，各位序大 ê 作品做kah足媠。逐个序大攏有一枝寫in ê 名專用毛筆！ 吊媠媠 ❤️

空間雖是傳統活動中心的簡樸，細節用心布置，足溫馨。庄跤四界是傳統紅磚仔厝，騎來活動中心路裡看著員林佇附近，想著較早台中招野餐，員林阿母𤆬2个幼囝騎o͘-tó͘-bái來台中足感心。

路lih經過幾若搭徛家邊仔飼雞鴨ê雞寮，有臭味，細漢足討厭，蹛冰冷 ê 都市久無鼻，一下鼻tio̍h：「是懷念 ê 自然氣味」心內按呢想。

4.埔鹽 順澤宮 冠軍帽仔 kah 賣菜阿桑

網路查著掠準是細間廟，帽仔我叫是分了矣。到門口才知毋是足大間，毋過起足懸看起來足媠，門口有阿sáng賣自家產菜蔬

「欲買菝仔無？家己種--ê，一粒10箍」kā買一袋。

「蔥仔欲--無？這把20。」Kā買一把。

「王梨欲--無？」

「我貧惰刣」

「我kā你刣。。。歹勢，是王梨我刣。」

「我知^^。」

一个阿伯行--來。

看in攏戴冠軍帽

「恁攏戴帽仔neh，敢閣有塊領？」

「有！你佗位人？敢有紮證件？阮在地ê袂當領(都領過ah。) 你去櫃台予伊看證件，過香爐，香火錢看你欲添偌濟。」

吩咐我起lih，伊先刣王梨。

證件看敢是本人，簽名kah手機閣有領 ê 時間日子。共我講欲下啥願kā講過香爐。我只是過路來到chia，想欲來拜拜kā神明相借問爾。無想著求啥。

最近大罷免情況無蓋好，毋過毋是欲求這。我欲求kiàn-kok，我欲求台灣人意識台灣話大興旺！過火！

足歡喜。

ùi廟出來，加一个o͘-bá-sáng來賣菜蔬，問我欲弓蕉無，一枇90(看起來有20chí)。我講食無hiah濟，伊講抑無一半，雖然10chí小可仔濟毋過足俗我講好。

1號阿桑kā講ài割較少leh，抑無伊1人食袂了。

2號阿桑講拄才人講欲1半你是咧。

兩人相冤。我講確實講一半。毋過我嘛表示1號阿桑講出我 ê 心聲。 1號阿桑kā2號--ê講割7、8子就好，1人食袂了。我嘛表示認同就按呢決定。

咧等 ê 時，1號閣問我欲青木瓜無，會使𤉙湯，抑是切絲濫時計果做伙食。我無料理過，閣已經買足濟車箱囥袂落閣貧惰煮。Kā講我siuⁿ頇顢袂曉煮推辭。

In咧對話 ê 時是in 家己 ê 中部腔，尾音會飛飛，是在地ê話，感覺足好聽。上課 ê 時，in 家己𤆬 ê 孫嘛會曉講台語，真好！

今仔日早起台中大雨一直落，下晡雖然落小雨，頂回力玄老師摔大雨我嘛騎過去矣，tùi我來講除非風颱天抑無好天ah歹天lóng無差，落雨顛倒khah涼。

心情真好❤️