2026 ê gō͘-ji̍t-cheh

Pài sì 18hō chái-khí khí-lâi nâ-âu thiàⁿ, 6chiat khò liáu, kái chok-gia̍p, chiap cchā-khò, koh khì kháu-chhì, tòng kàu àm-thâu-á, tńg kàu chhù, kui sin-khu nńg-kauh-kauh siān-tauh-tauh, liân khui chúi-kan ê khùi-la̍t to bô.

Iáuleh siūⁿ nâ-âu thiàⁿ m̄ chai kám sī kóng khò kui-kang ê koan-hē. pòaⁿ-mî chiah kám-kak sī kám-mō͘, hō͘ cc chhá khí-lâi, sūn-sòa chia̍h kám-mō͘ io̍h-á, ke khah hó lo̍h-bîn. 

Pài gō͘ 19hō gō͘-ji̍t-cheh chiàⁿ-ji̍t, tak-ke tōa-ko͘ lâi Tâi-tiong, tòe ang chò-hóe khì chia̍h ài-bé chhiū-thài-ló chhan-thiaⁿ, bô tēng ūi koh bān kàu, bô tántio̍h, kái khì tán bí-si̍t-ke ê Sushi express.  Chia̍h pá khì bē-tiûⁿ bé chia̍h-mi̍h tńg chhù, góa khùntàu, ang kā c, 69hòe ê tak-ke, tōa-ko͘ chhōa chhut-mn̂g khì hù-kīn sàn-pō͘ kiâⁿkiâⁿ leh. 

Tiong-tàu tńg--lâi ū thiaⁿ ta-ke kóng ta-koaⁿ kui ji̍t khut tī pâng-keng m̄-chhutlâi, thiaⁿ-kóng sī hiaⁿ-tī kòe-sin lâu 40bān ê sìn-iōng-khah chè-bū hō͘ i, chó͘chhù hông phah-bē. Sim-lāi ut-chut ê khoán. ta-koaⁿ chiok sioh-chêng. Chin chá í-keng ta-koaⁿ sin-thé bô hó khì mn̄gtāi-chì, kóng sī chhù--lih hit pêng bô an-lêng(Lâng lóng í-keng kòe-óng--ah, iáu leh éng-hióng ta-koaⁿ) tāi-chì pān pān leh to hó-sè--ah. Kúi-nā-nî āu ê kin-á-ji̍t, thiaⁿ tak-ke kóng ta-koaⁿ kha̍p-bē-tio̍h tō leh kau-tài hiō-sū... (Che kah góa chêng nn̄g nî ê kám-kak sió-khóa-á beh kâng, chit-má khah tiāⁿ-tio̍h--ah)

góa gō͘-ji̍t-cheh chiàⁿ-ji̍t lâng siōng-kài kan-khó͘, khùn kui e-po͘, io̍h-á tû-liáu tiâu sin-thé ê tiong-io̍h chiàu 3 tǹg, kám-mō͘ ê se-io̍h mā chiàu saⁿ tǹg. Chit kang koh bē-kì-tit chia̍h ta̍k-ji̍t ê khùn-chêng io̍h-á.

E-po͘ 6tiám hông kiò khí-lâi chiah be̍h-tong-lô. Ka-chài iáu chia̍h ē lo̍h. Keh-tńg-kang 20hō tiong-tàu khì Tâi-tiong āu chhia-thâu ê sin-sî-tāi pah-hòe(Chit-má kèng-jiân í-keng kái miâ chò oán-hiông pah-hòe--ah) 10lâu chia̍h Kiô-i-o͘ papa pizza chia̍h kah pá. Kah ang chò-hóe siáⁿ-mih to hó.  Chia̍h siuⁿ pá khì se̍h pah-hòe, tī chūn-nn̄g hia siòng chiok kú, ta̍k-piàn tòe ta-ke tōa-ko͘ chhut-mn̂g tō ē hō͘ cc chūn chi̍t nn̄g chia̍h ang-á. Chhiū-nâ ka-cho̍k cc mā khòaⁿ chiok kú, tōa-ko͘ kóng nā tòe i khì Ji̍t-pún chhit-thô tō bé hō͘ i. Cc tō sī bô táⁿm̄ káⁿ tòe. It-tēng ài papa ah-sī ma-ma chah--leh chiah ē-sáiXD

Lé-pài 21hō chá-khí chia̍h-pá koh khì khùn, khùn kàu tiong-tàu kóng beh khì chia̍h i83, tńg--lâi koh hioh khùn kàu chit-má. 

Cc kóng ka-chài góa m̄ sī kà-chheh siōng-khò ê sî kám-mō͘. Tio̍h--ā, ka-chài ka-chài. 

Cc chit nn̄g ji̍t m̄ kiaⁿ sí lâi chhōe góa khùn hō͘ góa òe--tio̍h, kin-á-ji̍t mā khùn kui e-po͘, khí-lâi sau-siaⁿ nâ-âu chiok thiàⁿ kiò góa chú moâi hō͘ i chia̍h.

tiāⁿ-tiāⁿ hioh-ká-ji̍t góa tō lâng kan-khó͘, iah-hó, khah iâⁿ kang-chok-ji̍t kan-khó͘...

2026 ê gō͘ji̍tcheh ká-ji̍t, tō án-ne pêng-pêng-an-an pêng-chēng tō͘ kòe--ah : )